Nagbigay ng mga alituntunin ang Albay Provincial Disaster Risk Reduction and Management Council (PDRRMC) at ang Albay Public Safety and Emergency Management Office (APSEMO) upang tiyakin ang kaligtasan ng publiko habang ipinagdiriwang ang Pasko at Bagong Taon.
Ayon sa advisory, pinayuhan ang mga lokal na pamahalaan (LGUs) na magtalaga ng mga ligtas na lugar para sa pagbebenta at pagpapakita ng mga paputok, malayo sa mga residential at business areas. Inirerekomenda rin na magtayo ng mga lugar para sa mga pampublikong fireworks exhibition upang matiyak ang kaligtasan ng mga residente.
Nagbigay-diin ang mga awtoridad na ang mga Local Disaster Risk Reduction and Management Offices (LDRRMOs) ay kailangang maghanda ng mga contingency plans at magtulungan sa mga lokal na ahensya upang magbigay ng 24/7 na serbisyo sa panahon ng mga holiday, partikular na sa December 24-25, 2024, at December 31, 2024 – January 1, 2025. Kasama na rito ang pagkakaroon ng mga ambulansya, mga tauhang medikal, at mga rescuer upang agad na tumugon sa mga emergency.
Pinayuhan din ang publiko na gumamit lamang ng mga paputok na aprubado ng Bureau of Fire Protection (BFP) at agad na iulat ang anumang insidente gamit ang provincial emergency number na 0947 570 0332.
Inaasahan ang kooperasyon ng lahat upang masiguro ang isang ligtas at masayang pagdiriwang ng Pasko at Bagong Taon sa buong lalawigan. | ulat ni Garry Carl Carillo | RP1 Albay
