Pinaalalahanan ng Department of Transportation (DOTr) ang publiko na planuhing maigi ang kanilang biyahe ngayong Holiday Season.
Kasabay nito, inanunsyo ng DOTr na maghahandog ng LIBRENG SAKAY ang Metro Rail Transit (MRT) Line 3 gayundin ang Light Rail Transit (LRT) Line 2 ngayong araw.
Batay sa anunsyo, magsisimula ang libreng sakay mula alas-7 hanggang alas-9 ng umaga at masusundan ito mula alas-5 ng hapon hanggang alas-7 ng gabi.
Dahil dito, hindi na kailangang gamitin ang Beep Card sa biyahe at sundin ang mga signage na inilatag para makapag-avail ng LIBRENG SAKAY.
Samantala, una nang inanunsyo ng Metropolitan Manila Development Authority (MMDA) na suspendido ang Unified Vehicle Volume Reduction Program (UVVRP) o mas kilala bilang Number Coding Scheme simula ngayong araw hanggang January 1 ng Bagong Taong 2025. | ulat ni Jaymark Dagala
