Posibleng ulanin ang Metro Manila at ilang karatig nitong lalawigan ngayong hapon.
Sa Thunderstorm Advisory ng PAGASA na inilabas kaninang 11:20 am, maaaring maranasan ang katamtaman hanggang sa may kalakasang ulan na may pagkidlat at malakas na hangin sa Rizal, Bulacan, Metro Manila at Nueva Ecija.
Ayon sa PAGASA, iiral ang thunderstorm sa loob ng dalawang oras.
Nararanasan na rin ang kaparehong kondisyon sa Quezon (Real) at Laguna (Pangil, Pakil).
Dahil dito, pinapayuhan ang mga residente sa mga apektadong lugar na mag-ingat sa epekto ng thunderstorm. | ulat ni Merry Ann Bastasa
