Patuloy pang kinakalinga ng Department of Social Welfare and Development (DSWD) ang tatlo pang Pinay surrogate mothers mula sa Cambodia.
Ayon kay DSWD Secretary Rex Gatchalian, mas pinili muna ng tatlong Pinay na mamalagi sa residential facilities sa halip na ma-reintegrate sa kani-kanilang pamilya.
Sabi pa ng kalihim, ang mga social workers at case managers ang umaasiste at tumutulong sa tatlong surrogate mothers upang matiyak na sila ay mentally, emotionally, and physically prepared bago ang reintegration.
Bilang tugon naman sa tanong sa posibilidad na ipaampon ang anak ng mga surrogate mothers, sinabi ng Kalihim na kung ano ang nararapat gawin para sa kapakanan ng mga bata ay gagawin ng DSWD.
Kabuuang 13 surrogate mothers ang kabilang sa 24 foreign women ang inaresto ng Cambodian police sa Kandal province noong Setyembre 2024 sa kasong attempted cross-border human trafficking.
Nitong Disyembre 29, dumating sa bansa ang 13 Pinay surrogate mothers matapos mabigyan ng Royal Pardon base na rin sa apela ng Philippine Embassy sa Phnom Penh. | ulat ni Rey Ferrer
