Aabot sa 134,147 motorista ang nahuli sa buong bansa noong 2024 dahil sa paglabag sa Republic Act 8750 o Seat Belt Law.
Ayon kay Land Transportation Office (LTO) Chief Vigor Mendoza II, resulta umano ito ng agresibong pagpapatupad ng batas ng ahensya.
Dahil sa pinaigting na kampanya, nakakolekta ang LTO ng P179.9 milyon mula sa multa ng mga lumabag.
Batay sa datos ng LTO, ang LTO-CALABARZON ang may pinakamaraming nahuling lumabag sa Seatbelt Law na may 32,485; sinundan ng LTO-Region 3 na may 10,774; at LTO-Region 6 na may 10,270.
Sa kabuuang bilang na nahuli mula Enero 1, 2024 hanggang Disyembre 31, may kabuuang 124,712 na ang nakapagbayad ng penalty, 53 ang ipinaglalaban pa rin ang paglabag habang ang iba ay hindi pa nakakapagbayad ng multa.
Nangako si Mendoza na susuportahan ang mga agresibong operasyon laban sa mga lumalabag sa Seatbelt Law bilang bahagi ng kampanya ng Stop Road Crash ng LTO. | ulat ni Rey Ferrer
