Ipinaabot ni Manila Mayor Honey Lacuna ang pasasalamat nito kay Pangulong Ferdinand R. Marcos Jr. sa pagdeklara ng Enero 9 bilang special non-working holiday sa Lungsod ng Maynila para sa paggunita ng Pista ng Poong Hesus Nazareno.
Ayon kay Mayor Lacuna, ang proklamasyon ay magbibigay pagkakataon para sa mga deboto ng Hesus Nazareno na makibahagi sa mga aktibidad ng kapistahan. Para naman sa mga hindi deboto, maaari nilang gamitin ang araw bilang pahinga o magtrabaho na may karagdagang holiday pay.
Dagdag pa ni Lacuna ang kanyang panawagan sa publiko na magtulungan upang mapanatili ang kaligtasan, kaayusan ng trapiko, at pagkakaisa sa lungsod sa panahong ito.
Pinasalamatan din niya ang Quiapo Church at ang Manila Archdiocese sa mga hakbang na isinagawa para matiyak ang kaligtasan ng lahat sa selebrasyon.
Ang Pista ng Poong Hesus Nazareno ay isang mahalagang tradisyon na muling inaasahang dadaluhan ng libo-libong deboto ngayong taon. | ulat ni EJ Lazaro
