Karumal-dumal na krimen agad ang bumungad sa mga tauhan ng Pasay Police sa unang araw ng Bagong Taon.
Wala nang buhay nang madatnan ng awtoridad ang isang 37-taong gulang na lalaki sa may E. Flores Street, Barangay 176, Malibay, Pasay City.
Ayon sa inisyal na imbestigasyon ng Kapulisan habang naglalakad sa labas ng bahay nito ang biktima na kinilalang si Cyriss Abaya ay bigla na lang itong binaril ng hindi pa nakikilalang lalaki.
Ayon sa Barangay Kagawad na si Michael Albesa, agad tumakas ang suspek matapos ang nasabing pamamaril.
Mabilisan naman umano ang ginawang pagresponde ng Malibay Sub Station 6 sa naturang pamamaril at agad ding nagsagawa ng hot pursuit operation ang mga ito. | ulat ni Lorenz Tanjoco
