Nanawagan ang grupong Teacher’s Dignity Coalition (TDC) sa Department of Education (DepEd) na ikonsidera ang pagtatalaga ng sapat na buffer days at academic health break sa mga darating na school year.
Ito aniya ay para sa kapakanan ng mga mag-aaral, gayundin para rin sa mga guro.
Ginawa ni TDC Chair Benjo Basas ang pahayag kasunod ng naitalang mababang attendance sa pagbabalik ng klase kahapon, January 2.
Ayon kay Basas, batay sa kanilang natanggap sa ulat, bihira lamang ang mga klase na umabot sa 50% attendance.
Paliwanag nito, bagamat nauunawaan nila ang dahilan ng DepEd dito, dahil ang School Year 2024-2025 ay transition year para maibalik ang dating school calendar, mahalaga pa rin daw na ito ay ma-rationalize.
Batay na rin, anila, sa kanilang karanasan, mas pinipili ng mga bata at magulang na hindi muna pumasok pagkatapos ng pagdiriwang ng Bagong Taon, lalo na kung ipit ang araw.
Upang maiwasan ang ganitong sitwasyon sa mga susunod na taon, nanawagan ang TDC na magpatupad ang DepEd ng remedyo ukol dito. | ulat ni Merry Ann Bastasa
📸 TDC
