Ikinakasa na ng Rizal Provincial Police Office ang patong-patong na kaso laban sa isang 28-anyos na lalaking kinilala lamang sa alyas na “Kenneth.”
Siya ang suspek sa madugong road rage sa Brgy. San Jose sa Antipolo City kahapon na ikinasawi ng 52-anyos na biktimang kinilala sa alyas na “Peter” na isang motorcycle rider.
Nag-viral pa sa social media ang naturang road rage incident na nangyari pasado alas-5 ng hapon kahapon na nagsimula sa sagutan na napunta sa suntukan hanggang sa nauwi na sa pamamaril.
Naisugod pa sa Cabading Hospital ang biktimang nagtamo ng tama ng bala ng baril sa ulo gayundin ang tatlong iba pang mga sugatan sa insidente kabilang na ang misis ng suspek.
Tinangka pang tumakas ng suspek sakay ng kulay itim na SUV subalit nasukol agad ito ng Pulisya sa tulong na rin ng inilatag na border checkpoint sa lugar. | ulat ni Jaymark Dagala
