Pormal nang nagbukas ang taunang pagdiriwang ng Mango- Bamboo Festival ng San Carlos City, Pangasinan sa pamamagitan ng Food Strip tampok ang ipinagmamalaking produkto ng lungsod na Mangga at Kawayan.
Nilahukan ito ng mga mag-aaral mula sa Pangasinan State University (PSU) San Carlos Campus gayundin ang Binalatongan Community College.
Ayon kay City Cooperative Entrepreneurship and Livelihood Development Office Head Arlaine De Vera, nakipag-partner sila sa PSU San Carlos Campus para iinnovate ang mga likhang produkto ng mga estudyante sa tulong ng mga miyembro ng kooperatiba upang mas mapaganda ang kalidad ng likha nilang produkto mula sa mangga at kawayan.
Ang proyekto ay isang community at academic partnership kung saan ang mga kooperatiba na ganap nang entrepreneurs ang tutulong sa mga estudyante na nais maging negosyante.
Katunayan ayon kay Dr. Liza Quimson, Executive Director ng PSU San Carlos Campus, nagkaroon na sila ng Memorandum of Agreement ng Lokal na Pamahalaan para sa programang Shared Facility ng Department of Trade and Industry (DTI) upang lahat ng produktong malilikha ng kanilang mga mag-aaral ay iinnovate sa tulong ng mga kooperatiba na kalaunan ay pwedeng ipa-patent sa DTI upang ito ay maging ganap na produkto ng San Carlos City.
Ngayong taon ng selebrasyon ang unang pagkakataong nakilahok ang PSU San Carlos Campus sa Food Strip tampok ang produktong gawa ng kanilang mga mag-aaral.
Sa tulong ng tanggapan ni Bb. Marmie Poquiz, Dekano ng College of Hospitality Management ng PSU San Carlos Campus, sila ang nagsasaliksik ng mga pamamaraan upang maka-likha ng mga produktong mula sa mangga at kawayan.
Sa darating na Abril 22-26 ay ipi-presenta nila sa nagpapatuloy na okasyon ang mga likhang produkto ng mga mag-aaral mula sa manga tulad ng pizza, tart, tinapay, cake, at iba pa.
Magtatagal naman ang selebrasyon hanggang Abril 30, 2025. | via Sarah Cayabyab | RP Dagupan
