Naglabas ng show cause order ang Metropolitan Manila Development Authority (MMDA) kay Special Operations Group-Strike Force Head Gabriel Go.
Ito ay kaugnay ng insidente ng umano’y pamamahiya sa pulis sa isang clearing operation ng MMDA sa Quezon City.
Sa isang pahayag, tiniyak ni MMDA Chairman Atty. Don Artes na dadaan sa due process ang naturang issue at kung sakaling mapatunayan ang alegasyon, papatawan ng kaukulang disciplinary action si Go.
Sumulat na rin ng liham ang MMDA kay Senator JV Ejercito kaugnay sa Facebook post nito tungkol kay Go na may sexual harrasment case na isinampa ang isang MMDA Lady Traffic Enforcer na naging sanhi ng pagbitiw nito sa puwesto noong 2023.
Ayon kay Artes, bagama’t nagbitiw si Go noong June 2023 at muling na-hire noong November ng parehong taon, wala naman umanong natanggap ang ahensya na pormal na reklamo laban kay Go o kahit anong dokumento na naipasa sa Committee on Decorum and Investigation. | ulat ni Diane Lear
