Welcome para kay House Ways and Means Committee Chair Joey Salceda ang hakbang ng Department of Transportation (DOTr) na rebyuhin ang implementasyon ng Public Transport Modernization Program.
Pinuri niya ang inisyatiba na ito ni Transportation Secretary Vince Dizon na aniya ay “long overdue” na.
Naglatag naman ng ilang mungkahi si Salceda kaugnay sa financial studies hinggil sa viability ng programa.
Ayon sa kongresista, ang presyo ng modern jeepney kada unit ang siyang tutukoy kung kakailanganin ang pagtaas ng pasahe sa hinaharap.
Batay na rin aniya sa impormasyon sa pagdinig ng House Committee on Transportation, kapag mas mura ang PUJ units na mabibili ay mas mababa ang fare adjustments.
Mayroon naman aniyang domestic manufacturer na nag-aalok ng mas murang alternatibo kumpara sa naunang imported units na nabili.
Dapat din aniyang mabawasan ang gaps sa pagitan ng public transport routes upang maging inclusive ang public transport systems para sa senior citizens at persons with disabilities.
Kailangan na rin aniya ng disenteng public transport routes para sa mga paliparan na isa sa mga problema sa ilang rehiyon tulad na lamang sa Bicol. | ulat ni Kathleen Jean Forbes
