Nagbabala ang DOST-PHIVOLCS kaugnay ng pagtaas ng volcanic activity ng Bulkang Bulusan matapos maitala ang 109 volcanic earthquake mula alas-12 ng madaling araw hanggang alas-3 ng hapon ngayong Hulyo 28.
Ayon sa PHIVOLCS, halos lahat ng naitalang lindol ay volcano-tectonic earthquake, na indikasyon ng pagbitak ng mga bato sa mababaw na bahagi ng bulkan.
Dahil dito, tumataas ang posibilidad ng phreatic o steam-driven eruption mula sa alinman sa mga summit vent ng Bulusan.
Nananatili ang Alert Level 1 o low-level unrest sa bulkan.
Mahigpit ding ipinagbabawal ang pagpasok sa loob ng 4-kilometer Permanent Danger Zone (PDZ), at pinaiigting ang pagbabantay sa 2-kilometer Extended Danger Zone (EDZ) sa timog-silangang bahagi nito.
Pinaghahanda rin ang mga komunidad sa posibleng ashfall at iba pang volcanic hazard, habang pinayuhan ang mga piloto na iwasang lumipad malapit sa tuktok ng Bulkang Bulusan.
About the Author
