Pansamantalang ititigil ang operasyon ng ilang KADIWA ng Pangulo outlets, kabilang ang pagbebenta ng abot-kayang P20 kada kilong bigas, mula Nobyembre 16 hanggang 18, 2026, bilang bahagi ng paghahanda at pagsasagawa ng ika-49 na Association of Southeast Asian Nations (ASEAN) Summit sa bansa.
Sa inilabas na opisyal na abiso para sa mga mamimili, nilinaw na ang pansamantalang suspensyon ay bahagi ng mga hakbang sa seguridad, trapiko, at kaayusan habang idinaraos ang nasabing pandaigdigang pagtitipon sa Pilipinas.
Gayunpaman, binigyang-diin ng pamunuan na hindi lahat ng sangay ay apektado. May ilang piling KADIWA outlets pa rin ang mananatiling bukas sa mga itinakdang petsa at lokasyon upang patuloy na makapaghatid ng murang bilihin at bigas sa publiko.
Pinapayuhan ang mga suki at mamimili na sumangguni muna sa opisyal na iskedyul na inilabas ng ahensya bago magtungo sa mga pamilihan upang malaman kung aling mga lugar ang bukas at magagamit sa loob ng tatlong araw na aktibidad.
Nagpasalamat din ang pamunuan sa patuloy na pang-unawa, suporta, at pakikiisa ng publiko para sa matagumpay na pagdaraos ng ika-49 na ASEAN Summit.