Inihayag ng Philippine Navy ang plano nitong dagdagan pa ang kanilang mga asset na may kakayahang palakasin ang kanilang anti-submarine capabilities.
Ito ang inihayag ni Navy Spokesperson for the West Philippine Sea, Rear Admiral Roy Vincent Trinidad matapos mamataan ang isang Russian Submarine sa Cape Calavite sa Occidental Mindoro nito lamang November 28.
Sa pulong-balitaan sa Kampo Aguinaldo, sinabi ni Trinidad na nakapagsumite na sila ng proposal para sa pagbili ng dalawa pang karagdagang corvettes o di kaya’y frigate.
Binigyang-diin pa ni Trinidad na malaki ang pangangailangan para sa karagdagang Naval assets ng Pilipinas upang lalo pang mapalakas nito ang seguridad mula sa panlabas na banta.
Sa kasalukuyan, mayroong dalawang (2) missile frigate ang Pilipinas, ang BRP Jose Rizal at BRP Antonio Luna na may kakayahan din sa anti-submarine warfare.
Habang may dalawang (2) guided missile corvette at anim (6) na offshore patrol vessels ang kasalukuyang binubuo sa South Korea, at dalawa (2) pang landing docks naman ang binubuo sa Indonesia. | ulat ni Jaymark Dagala
