Umapela ang lokal na pamahalaan ng La Castellana na huwag samantalahin ang mga hog raisers na kasalukuyang apektado ng abnormal na aktibidad ng Bulkan Kanlaon.
Ayon sa LGU, inilipat na ang mga alagang hayop sa mga livestock shelter para sa kanilang kaligtasan kasunod ng isinagawang mass evacuation ngunit may mga residenteng napipilitang ibenta ang kanilang mga hayop. Hiling ng LGU, bilhin ang mga ito sa tamang halaga upang matulungan na rin ang mga magsasaka.
Binibigyang-diin din ng pamahalaan ang respeto sa kabuhayan ng mga hog raisers at nagpasalamat naman sa mga mamamayang nakikiisa at tumutulong sa panahon ng krisis.
Matatandaan na itinaas sa Alert Level 3 ang Bulkan Kanlaon kasunod ng pagputok nito noong Disyembre 9. Mahigpit na ipinagbabawal ang pagpasok sa 6-KM Expanded Danger Zone ng Bulkan. | ulat ni Hope Torrechante| RP1 Iloilo
