Itinuturing na ‘fake news’ ng Philippine National Police (PNP) ang kumakalat na memorandum sa social media na nagsasaad ng di-umano’y pagkansela sa pamamahagi ng Service Recognition Incentive (SRI) ng mga Pulis para sa 2024.
Ayon sa PNP, kasalukuyang pinoproseso ng PNP Finance Service ang SRI ng mga Pulis katuwang ang Directorate for Personnel and Records Management (DPRM) upang maipamahagi na ito agad sa mga kuwalipikadong tauhan ng PNP.
Sa inilabas na pahayag ng PNP Public Information Office (PIO), magsisilbing gabay ng Directorate for Comptrollership ang fiscal directive na inaprubahan ni PNP Chief, Police General Rommel Francisco Marbil para sa maayos na pagpapalabas ng pondo.
Pinag-iingat naman ng PNP ang mga tauhan nito gayundin ang publiko na maging mapanuri at maingat sa mga dokumentong kumakalat online na layuning sirain ang integridad ng kanilang organisasyon.
Kasunod nito, ipinag-utos din ni Marbil ang malalimang imbestigasyon sa usapin upang tukuyin at papanagutin ang sinumang nagpapakalat ng maling impormasyon. | ulat ni Jaymark Dagala
