Hindi makakaapekto sa kinahaharap na kaso sa Pilipinas ni dating Presidential Spokesperson Harry Roque, ang plano nitong humingi ng political asylum sa Netherlands, habang nananatili sa The Hague, si dating Pangulong Rodrigo Duterte.
Sa press briefing sa Malacañang, ipinaliwanag ni Communications Usec. Claire Castro na para ma-grant o maaprubahan ang hiling na political asylum ni Roque, dapat muna itong makapaglatag ng matibay na ebidensya o suporta sa umano’y political persecution sa kaniya.
“Hindi naman ito makakaapekto. Unang-una po, magpa-file pa lang po yata siya ng petition at hindi pa po ito naga-grant. Tandaan po natin, bago po ito ma-grant dapat mapalabas niya po na may well-founded fear of political persecution.” — Usec Castro.
Sabi ni Usec. Castro, walang nagaganap na political persecution laban kay Roque, lalo’t mayroong hawak ng ebidensya ang Presidential Anti-organized Crime Communications (PAOCC), na nag-uugnay kay Roque sa PGP operations ng Lucky South 99.
“Tandaan din po natin na ang mga ebidensiyang nakalap ng PAOCC at that time ay bigla na lang lumapag sa harapan ng PAOO without even any effort – nakita lang po itong mga dokumentong ito, bank documents ni Atty. Harry Roque sa Lucky South 99; nakita rin ang mga dokumento noong kaniyang assistant AR Dela Serna in Lucky South 99; third, there is also a document referring to contract of lease with a certain manager/alleged manager of Lucky South 99, bumagsak lang din po iyan sa harapan ng PAOCC.” — Usec. Castro.
Payo ng opisyal, harapin na lamang ni Roque ang mga reklamong inihain laban sa kaniya.
“So, how could there be a political persecution if all the pieces of evidence are overwhelming. So, wala po tayong nakikitang political persecution, harapin na lang po niya ang kaso niya po dito – mas maganda po iyan para maipakita niya sa taumbayan na wala po talaga siya kasalanan.” — Usec. Castro. | ulat ni Racquel Bayan
