Ang pagkakaroon ng permanenteng evacuation centers ang nakikitang solusyon ni Ang Probinsyano Party-list Representative Alfred Delos Santos para sa mga residenteng nakatira sa 6-kilometer danger zone sa palibot ng Bulkang Mayon.
Ayon sa kinatawan, bagamat magandang mai-relocate sana ang mga nakatira sa paanan ng bulkan, marami sa kanila ang bumabalik pa rin doon dahil sa naroroon ang kanilang kabuhayan.
Kaya naman bilang alternatibo, mas maigi na magkaroon na lamang aniya ng mga permanenteng evacuation center, lalo na sa mga lugar na mayroong aktibong bulkan.
Sa kasalukuyan, napagtibay na ng Kamara ang panukalang pagtatatag ng evacuation centers sa lahat ng bayan at munisipalidad sa bansa at nakabinbin naman sa Senado.
Nakapagpaabot na rin ng tulong si Delos Santos sa may 1,700 na pamilyang lumikas mula sa Guinobatan.
Naabutan ang mga ito ng relief goods at personal hygiene items. | ulat ni Kathleen Jean Forbes
