Unti-unti nang matutugunan ng Land Transportation Office ang mga pending na driver’s license plastic cards.
Kasunod ito ng pagdating ng unang batch ng mga bagong license cards sa ahensya mula sa kanilang supplier na Banner Plasticard, Inc.
Pinangunahan ni DOTR Sec. Jaime Bautista kasama ang bagong talagang LTO Chief na si Asec. Vigor Mendoza II ang pagtanggap sa nasa 5,000 license cards.
Ayon sa LTO, inaasahan nitong makukumpleto na ang nasa 1 milyong cards mula sa Banner Plasticard, Inc. sa susunod na 60 araw.
Una nang sinabi ni DOTR Sec. Bautista na maaaring magtungo na sa mga tanggapan ng LTO simula sa Agosto hanggang Setyembre ang mga motoristang naisyuhan ng paper license para maipapalit ito sa physical license cards. | ulat ni Merry Ann Bastasa
