Suspendido na rin ang pasok ng mga mag-aaral sa lahat ng antas, mapa-pampubliko at pribadong paaralan sa lungsod ng Maynila ngayong araw.
Ito’y ayon sa Pamahalaang Lungsod bunsod ng magdamagang pagbuhos ng ulan na nagresulta na ng mga pagbaha sa ilang dako ng lungsod.
Alinsunod na rin ito sa rekomendasyon ng Manila Disaster Risk Reduction and Management Office gayundin ng Manila Police District.
Ayon kay Atty. Princess Abante ng Manila Public Information Office, hindi lamang sa face-to-face epektibo ang suspensyon ng klase kundi maging sa online classes.
Samantala, pinagana na rin ng Manila LGU ang pagkakaloob ng Libreng Sakay mula pa kaninang alas-4 ng madaling araw. | ulat ni Jaymark Dagala
