Siniguro ng Commission on Elections (COMELEC) na walang magiging profiling sa mga Sangguniang Kabataan o SK elections candidates.
Sa interpelasyon ni Kabataan Party-list Representative Raoul Manuel, naungkat nito ang umano’y pag-aalok ng pabuya ng National Youth Commission (NYC) sa makapagtuturo ng umano’y “recruiters” sa hanay ng SK candidates.
Bukod pa aniya ito sa ulat, na ang Philippine National Police (PNP) ay nagpapakalat ng profiling forms sa Iloilo at Antique.
Ayon kay COMELEC Chair George Garia, wala silang nalalaman ukol sa hakbang na ito ng NYC man o ng PNP.
Dagdag pa ng opisyal, na hindi pinahihintulutan ng COMELEC ang anumang uri ng profiling sa eleksyon, dahil karapatan aniya ng bawat isa na mabigyan ng pantay at patas na pagkakataon na makaboto at iboto salig sa Saligang Batas. | ulat ni Nimfa Asuncion
