Muling ipapatawag ng Department of Foreign Affairs ang mga opisyal ng Chinese Embassy bunsod ng magkakasunod na insidente sa West Philippine Sea.
Sa pagsalang ng panukalang budget ng DFA sa plenaryo, nausisa ni OFW party-list Rep. Marissa Magsino kung mayroon pang natitirang “diplomatic options” ang ahensya upang igiit ang sovereign rights sa WPS.
Nagiging “procedural formality” na lamang kasi aniya ang paghahain ng diplomatic protests ng DFA.
Hindi rin naman aniya ito pinapansin ng China at patuloy na ipinagsasawalang bahala ang arbitral ruling na naipanalo ng Pilipinas.
Tugon ni Nueva Ecija Second District Representative Joseph Gilbert Violago, sponsor ng budget ng DFA, na iimbitahan ng ahensya ang Chinese embassy officials upang ipabatid ang mensahe ng ating pamahalaan kay Chinese Foreign Minister Wang Yi.
Hanggang nitong September 20, 2023, umabot na sa 111 diplomatic protests ang naihain ng DFA laban China sa ilalim ng Marcos Jr. administration. | ulat ni Kathleen Jean Forbes
