Naisumite na ng Philippine Health Insurance Corporation o PhilHealth ang kanilang komprehensibong ulat sa National Privacy Commission (NPC).
Ito’y sa pagpapatuloy ng isinagawang pulong ng dalawang ahensya ng pamahalaan kasunod ng nangyaring pag-atake ng MEDUSA ransomware sa online system at website ng pangunahing state health insurer.
Sa panayam kay PhilHealth Senior Vice President Dr. Israel Francis Pargas, sinabi nito na mula pa noong isang linggo ay puspusan ang ginagawa nilang pagdodokumento sa kanilang mga apektadong datos.
Layunin nitong matingnan kung may mga datos silang nalagay sa kompromiso kasunod ng naturang pag-atake
Gayunman, sinabi ni Pargas na sa pauna nilang imbestigasyon ay walang personal o medical na impormasyon mula sa kanilang mga miyembro ang kumalat o nag-leak.
Patuloy namang umaasa ang PhilHealth na maibabalik na sa normal ang sitwasyon ng kanilang online system at website ngayong araw, matapos ang isinagawang pag-iinspeksyon ng mga taga-NPC. | ulat ni Jaymark Dagala
