Nanawagan si Senador Christopher ‘Bong’ Go sa iba’t ibang ahensya ng gobyerno, gaya ng Department of Social Welfare and Development (DSWD) at Department of Trade and Industry (DTI), na gamitin ang kanilang mga unutilized fund o mga hindi pa nagagamit na pondo para matulungan ang mga Pilipino na makaagapay sa pagtaas ng presyo ng langis at mga pangunahing bilihin.
Ito ay sa gitna na rin ng kaguluhan sa Israel na inaasahang makakaapekto sa presyo ng produktong petrolyo sa pandaigdigang merkado.
Binigyang-diin ni Go na kapag tumaas ang presyo ng langis ay tiyak na magsusunuran ang pagtaas ng presyo ng pangunahing bilihin.
Kaya naman dapat aniyang magkaroon agad ng government intervention, lalo na para sa mga mahihirap na pamilyang Pilipino.
Pinunto ng senador na malapit nang matapos ang taon kaya naman kung may natitira pang pondo ang mga ahensya na maaaring ibigay na pang ayuda sa mga mahihirap ay dapat na itong ilabas at ibigay ang nararapat na tulong mula sa gobyerno. | ulat ni Nimfa Mae Asuncion
