Titimbangin muna ni Senador Ronald ‘Bato’ Dela Rosa ang pulso ng mga kapwa niya senador tungkol sa confidential and intelligence fund (CIF) ng mga civilian government agencies gaya ng Department of Education (DepEd), Office of the Vice President (OVP), Department of Foreign Affairs (DFA) at Department of Information and Communications Technology (DICT).
Pero para kay Dela Rosa, nararapat lang na bigyan ng confidential fund ang DepEd para mapigilan ang recruitment ng mga makakaliwang grupo sa mga kabataan.
Bagama’t wala aniyang problema ang senador kung tatanggalin ang CIF ng DepEd ay aminado siyang
nasasayangan siya sa oportunidad na malabanan ang recruitment ng CPP-NPA-NDF ng mga bata sa mga eskwelahan.
Ipinaliwanag rin ng mambabatas na kung ibibigay kasi sa DepEd ang CIF fund ay mas matututukan ang anti-insurgency sa mga paaralan kumpara kung ipapaubaya ito sa mga uniformed agencies gaya ng PNP at AFP.
Pagdating naman sa DICT, sinabi ni Dela Rosa na nagkakaisa naman silang mga senador na dagdagan ang budget ng ahensya para mapalakas ang laban kontra sa cybercrime.
Ang DFA naman aniya, bagama’t nais ng senador na mabigyan sana ng CIF para sa international strategic intelligence ay una naman nang tumanggi na mabigyan sila ng CIF. | ulat ni Nimfa Mae Asuncion
