Aabot sa humigit kumulang 25 Overseas Filipino Workers (OFWs) mula Israel ang nakatakdang umuwi sa bansa ngayong araw.
Ito’y ayon sa Department of Migrant Workers (DMW) ang ikatlong batch ng mga Pilipinong magbabalik bansa matapos maipit sa pagsiklab ng gulo sa Israel.
Ayon sa DMW, sakay ang mga naturang OFW ng Etihad Airways flight EY424 at nakatakdang lumapag sa Ninoy Aquino International Airport (NAIA) Terminal 3 ganap na alas-3:55 ng hapon.
Doon, sasalubungin sila ng mga opisyal at kinatawan mula sa DMW, Overseas Workers Welfare Administration (OWWA), at Department of Foreign Affairs (DFA).
Magugunitang nitong Sabado, nakabalik na ng bansa ang may 87 OFWs kasama ang tatlong batang anak ng ilan sa mga OFW kung saan, sumailalim sila sa debriefing, binigyan ng tulong pinansyal, at inihatid pa ng pamahalaan sa kani-kanilang destinasyon. | ulat ni Jaymark Dagala
