Kinoronahan bilang Miss ROTC (Reserve Officer Training Corps) Philippines 2023 si Cadette Angel Brahms Bernaldez ng Bicol University sa ilalim ng 5th Regional Community Defense Group (5RCDG) ng Philippine Army.
Ito’y sa isinagawang coronation night ng National Finals ng beauty pageant na bahagi ng ROTC Games 2023 sa Cuneta Astrodome, Pasay City, kagabi.
Kasama sa mga kinoronahan sa National Finals sina first runner-up Cadette Mikaela Ingaran at second runner-up Cadette Julianne Rose Reyes kapwa mga ROTC cadette ng Philippine Air Force.
Nasa 21 kandidato mula sa iba’t ibang RCDG sa Luzon, Visayas, at Mindanao ang nakapasok sa National Finals kagabi.
Binati ng pamunuan ng Philippine Army si Cadette Bernaldez, na unang nagwagi bilang Miss ROTC Luzon 2023, kasama ang iba pang ROTC cadette ng Philippine Army na nagwagi sa Regional Finals.
Kabilang dito sina: Cadette Sophia Bianca Matas ng Quezon City University na hinirang bilang Ms. ROTC NCR 2023; Cadette Sarah Andrea Matulac ng University of San Agustine na Ms. ROTC Visayas 2023; at Cadette Jassel Mea Garcia ng Mindanao State University na Ms. ROTC Mindanao 2023. | ulat ni Leo Sarne
