Ipinag-utos ngayon ni Land Transportation Office (LTO) Chief Assistant Secretary Atty. Vigor D. Mendoza II ang mahigpit na pagpapatupad ng ‘No Registration, No Travel’ Policy sa mga motorista.
Kasunod ito ng isinagawang review ng ahensya kung saan lumalabas na 65% ng motor vehicles sa bansa ang maituturing na ‘delinquent’ dahil hindi rehistrado.
Katumbas ito ng 24.7 milyong delinquent motor vehicles na binubuo ng higit 20 milyong mga motorsiklo, 4.01 milyong four-wheeled vehicles at nasa 490,000 na trucks at buses.
Nangunguna sa may pinakamalaking bilang ng delinquent motor vehicle owners ang NCR na umabot sa 4.1 milyon.
“Yung included sa report na ito ng delinquent motor vehicles ay yung mga sasakyan na based sa aming record ay more than one year nang hindi nare-renew ang registration. Hindi pa kasama dito yung mga less than a year na hindi naka-renew ng registration,” Mendoza.
Para sa LTO Chief, labis na nakakaalarma ang bilang na ito lalo’t batay rin sa kanilang assessment, ang mga sasakyang hindi nakarehistro ang kadalasang nagkakaproblema sa roadworthiness inspections.
Ayon sa kalihim, kailangang maging mahigpit sa pagpapatupad ng polisiya sa motor vehicle registration alinsunod na rin sa direktiba ng DOTr na gawing mas ligtas ang bawat kalsada sa lahat ng road users.
“In other words, these motor vehicles are threats to road safety. We have to be very strict in implementing the laws on land transportation not only to make it fair to the law-abiding motor vehicle owners but also for the welfare of the road users,” said Mendoza.
Kaugnay nito, inatasan na ni Mendoza ang lahat ng LTO regional directors na paigtingin ang hakbang sa pagpapatupad ng “No Registration, No Travel” policy.
“Hindi natin papayagan ito. May obligasyon ang bawat vehicle owners na i-rehistro ang kanilang mga sasakyan at ang tututukan natin ngayon ay ang strict compliance sa obligasyong ito,” | ulat ni Merry Ann Bastasa
