Lumahok si Philippine Air Force Chief Lt. General Stephen Parreño kasama ang kanyang mga katuwang mula sa 22 bansa sa isinagawang Pacific Air Chief Symposium (PACS) 2023 sa headquarters ng Pacific Air Forces sa Hawaii.
Ang pagtitipon ng mga senior air force official mula sa Indo-Pacific, Europe, South America, at North America ay sa layong mapalakas ang kooperasyon sa pagtugon sa mga hamon sa regional security.
Nakatuon din ang pagtitipon sa pagsulong ng “interoperability” ng mga magkaalyadong bansa at pagpapalakas ng kapabilidad sa humanitarian assistance at disaster relief.
Nagkaroon si Lt. Gen. Parreño ng mga bilateral at multilateral na pagpupulong sa mga hepe ng air force ng US, Australia, Japan, Thailand, Brunei, Vietnam, at France.
Inanyayahan din si Lt. Gen. Parreño na maging isa sa mga panel members na tumalakay sa “Air Domain Awareness”, at iba pang paksang pandepensa. | ulat ni Leo Sarne
📷: PAF
