Inihayag ng Department of Transportation (DOTr) na magkakaroon lang ng minimal effect sa inflation ang panukalang taas-pasahe sa Metro Rail Transit Line 3 (MRT-3).
Sa isang pulong balitaan, ipinaliwanag ni Transportation Assistant Secretary for Railways Jorjette Aquino ang panukala na P16 na minimum fare mula sa dating P13, at P34 na pasahe mula North Avenue Station hanggang Taft Avenue Station.
Ani Aquino, ang karagdagang kita ay makatutulong upang mabawasan ang P41 na subsidiya ng pamahalaan sa bawat pasahero ng MRT-3.
Kapag naman naaprubahan ang panukalang taas-pasahe sa MRT-3 ay ilalaan aniya ng pamunuan ang kita para sa pagpapabuti pa ng serbisyo ng linya at maintenance ng mga tren.
Huli namang nagtaas ng pasahe ang MRT-3 noong January 2015. | ulat ni Diane Lear
