Sasailalim sa limang araw na isolation period si Pangulong Ferdinand R. Marcos Jr. matapos na magpositibo sa COVID-19.
Ayon sa Presidential Communications Office (PCO), ito ay bilang pagtalima na din sa ipinatutupad na health protocol.
Sa harap nito ay tiniyak ng Palasyo na nananatiling fit o nasa maayos na kondisyon ang Pangulo para tuloy-tuloy na magampanan ang kanyang tungkulin.
Patuloy, ayon sa PCO, na gagampanan ng Chief Executive ang kanyang trabaho kabilang na ang mga pagpupulong sa pamamagitan ng teleconference.
Sa harap nito’y hinikayat ni Pangulong Marcos ang publiko na i-obserba ang kaukulang pag-iingat lalo na ngayong holiday season kasabay ng paalalang mas mabuting may bakuna sa COVID-19 at manatiling nakasuot ng face mask lalo na sa mga matataong lugar.
Magbibigay ng update ang Palasyo hinggil sa kalagayan ng Punong Ehekutibo. | ulat ni Alvin Baltazar
