Hinimok ng zero waste and toxics-free advocacy group na EcoWaste Coalition ang publiko na iwasan ang paggamit ng paputok sa pagsalubong sa bagong taon.
Inulit ng EcoWaste Coalition ang apela nito para sa “Iwas Paputoxic” sa isang community program at parade na ginanap sa Caloocan City kaninang umaga.
Inorganisa ang aktibidad sa Barangay 176 at ng Partnership for Clean Air (PCA) na sinamahan ng mga kinatawan ng barangay, bumbero at pulisya at mga e-waste dismantlers mula sa Samahan ng mga Mangangalakal sa Bagong Silang (SMBS) at Samahan ng mga Mangangalakal sa San Vicente Ferrer Camarin, Caloocan City (SMSVFCCC).
Kaisa ang EcoWaste Coalition ng Caloocan City Government, DILG, DOH sa pagtataguyod ng ligtas at payapang pagsalubong sa 2024.
Sinabi naman ni Bagong Silang Punong Barangay Joel Bacolod, mababawasan ang disgrasya, sunog, usok at kalat kung ang bawat isa, lalo na ang mga bata, ay iiwas sa pagpapaputok.
Sa halip na paputok, hinimok ng EcoWaste Coalition ang publiko na salubungin ang bagong taon sa pamamagitan lamang ng pagtugtog ng musika o paggamit ng mga substitute na pampaingay tulad ng torotot, mga kaldero at kawali, alkansya at kung ano pa. | ulat ni Rey Ferrer