Nagdulot ng mabigat na daloy ng trapiko ang nangyaring aksidente sa may Magallanes, Makati City ngayong umaga.
Batay sa inisyal na imbestigasyon ng Metropolitan Manila Development Authority (MMDA), kumabig ang Ford Ecosport at tinamaan ang concrete barrier. Doon naman nabangga ang isang kotse na bumabaybay sa naturang kalsada.
Ayon pa sa mga imbestigador ay nakainom ang driver ng SUV at ang kasama nito habang isang foreigner naman ang may-ari ng nadamay na kotse.
Samantala, patuloy ang isinasagawang clearing operations sa natirang linya dahil tumagas ang langis ng SUV bunsod ng lakas ng pagkakabangga nito.
Sa ngayon ay mabigat pa rin ang daloy ng trapiko hanggang sa mga oras na ito kung saan kasalukuyan pa ring inaalis ang mga debris at langis na tumagas sa kalsada upang hindi na magdulot ng ano mang disgrasya. | ulat ni AJ Ignacio
