Siniguro ng Department of Social Welfare and Development (DSWD) sa publiko na hindi magagamit sa politika ang mga programa at serbisyo ng ahensya.
Ayon kay DSWD Assistant Secretary for Strategic Communications Romel Lopez, walang basehan at walang katotohanan ang lahat ng mga alegasyon na umano’y nagagamit ang Assistance to Individuals in Crisis Situation (AICS) program sa Peoples Initiative na naglalayon upang amyendahan ang Konstitusyon.
Nilinaw ng opisyal na ang tunay na layunin ng AICS program ng DSWD ay ang makatulong sa mga nangangailangan at nahaharap sa krisis sa pamamagitan ng pagbibigay ng suportang medikal, funeral, transportation, at pagpapalibing.
“Nakakadalawang hearing na po tayo sa Senado, when it comes sa PI, when it comes po doon sa ayuda scam pero ni isang kawani ng DSWD, walang na-identify na involved sa kahit anong alegasyon na ito,” ani Asst. Sec. Lopez.
Nilinaw din ni Asst. Sec. Lopez na hindi kasabwat ang mga tauhan ng ahensya sa charter change campaign.
“Wala naman pong nabanggit talaga na, to be honest, na pangyayari na nagamit yung any programa of DSWD. Ang narinig po natin doon, yun daw pong pinangangalandakan ng mga allegedly nangangalap ng pirma. Kumbaga yun po ang kanilang promise na makatatanggap kayo pero wala pong na-disburse at wala pong madi-disburse na pera ng DSWD to that effect,” paglilinaw pa ni Asst. Sec. Lopez. | ulat ni Merry Ann Bastasa