Welcome para kay Senior Citizens Party-list at Rep. Rodolfo “Ompong” Ordanes ang pagsisimula ng pamamahagi ng P1,000 na social pension para sa mga indigent senior citizen.
Ayon kay Ordanes, nagbunga ang kanilang pagsusumikap na isulong ang ikagiginhawa ng mga senior citizen sa bansa.
Mula sa dating P500 ay nadoble ito matapos maging ganap na batas ang Republic Act No. 11916 o Act Increasing the Social Pension of Indigent Senior Citizens noong 2022.
Hindi nga lang ito naipatupad agad dahil sa nang buoin ang 2023 National Budget ay hindi pa ito batas.
Ngunit ngayong 2024, tiniyak ng pamaalaan na ito ay maisama na sa pambansang budget.
Ayon sa DSWD kada semester ibibigay ang social pension na magkakahalaga ng P6,000.
Pero apela ni Rep. Ordanes, gawin na lang sana itong quarterly upang hindi na maghintay ng matagal ang mga senior citizen.
“Sure na yan na matatanggap na ng mga senior citizens yan P1,000. Napondohan na yan sa DSWD at bahala na po ang DSWD kung pano nila (i)-implement. Request ko nga lang sana ay ipamahagi nila quarterly sapagkat kung semi-annual ay matagal magaantay mga senior citizens.” saad ni Ordanes
Pinangunahan naman ni First Lady Liza Araneta-Marcos at DSWD Sec. Rex Gatchalian ang ceremonial social payout sa DSWD Central Office ngayong araw. | ulat ni Kathleen Forbes