Umapela si Office of the Presidential Adviser for Peace Reconciliation and Unity (OPAPRU) Secretary Carlito Galvez Jr. sa mga mamayan na talikuran ang panawagan na kumalas ang Mindanao sa Pilipinas.
Sa isang kalatas, sinabi ni Galvez na ang naturang hakbang ay kabaliktaran ng itinatakda sa konstitusyon, na saligan ng pagkakakilanlan ng Pilipinas.
Kontra din aniya ito sa mga prinsipyo ng isang bansang kasalukuyang tinatamasa ang mga benepisyo ng komprehensibong prosesong pangkapayapaan na nagwakas ng dekadang kaguluhan sa Mindanao.
Panawagan ni Galvez sa mga mamayan, na patuloy na suportahan ang “peace, reconciliation and unity agenda” ng Pangulong Ferdinand Marcos Jr.
Giit ni Galvez, hindi na makakayanan ng bansa na bumalik sa “square one”, at sa pamamagitan lang ng kapayapaan at pagkakaisa makakasulong ang Pilipinas. | ulat ni Leo Sarne