Bilang suporta at pagsusulong na magkaroon ng OFW lounges sa mga paliparan sa bansa ay nag-donate si OFW Party-list Representative Marissa Magsino ng pagkain at apat na unit ng high-grade plasma air purifiers sa bagong bukas na OFW Lounge sa NAIA Terminal 1.
Ayon kay Magsino, paraan ito para suklian ang sipag at dedikasyon ng ating mga OFW bago sila umalis patungo sa kani-kanilang overseas assignments.
Kada araw, nasa 1,000 OFW ang napagsisilbihan ng OFW Lounge mula nang ito ay buksan noong January 16.
“It was a dream turned into reality as the OFW Party-list worked closely with OWWA, DMW, MIAA, and DOTr from September 2023 to January 2024 on the preparations for and renovations on the OFW Lounges in NAIA Terminals 1 and 3. Ako po ay nagpapasalamat sa masisipag na opisyal at kawani ng mga ahensyang ito na sineryoso ang panawagan na magkaroon ng magandang espasyo para sa ating mga OFWs sa ating airport,” sabi ni Magsino.
Kasalukuyan namang isinasaayos ang 270 square meter na OFW lounge sa Terminal 3 sa pagtutulungan ng OWWA at DMW. | ulat ni Kathleen Jean Forbes