Hinimok ng Department of Transportation (DOTr) ang mga kawani ng Philippine Coast Guard (PCG) na bumalik sa kanilang basic training at pairalin ang disiplina sa kanilang hanay.
Ito ang paalala ni Transportation Secretary Jaime Bautista sa mga kawani ng PCG sa isinagawang 2024 New Year’s Call, ngayong araw.
Ayon sa kalihim, sa mga nakalipas na taon naging mapang-hamon ang paggampan ng PCG sa kanilang tungkulin. Mas naging mahirap rin aniya ang maging tagapagbantay ng ating karagatan.
Kumpiyansa naman ang transport chief na sa tulong ng modernong marine assets, mas magagampanan ng maayos ng mga kawani ng PCG ang kanilang tungkulin gayundin ang pagprotekta sa marine borders ng bansa.
Sa huli, nagpasalamat naman si Bautista sa mga kawani ng PCG na aniya ay mas mabigat na mandato na tiyakin ang kaligtasan ng mga pasahero sa mga pampublikong sasakyan, tren, paliparan, at pantalan. | ulat ni Diane Lear