Mababalewala lang ang panukalang umento sa sahod kung hindi pa rin tatalima ang mga kompanya sa minimum wage orders.
Ito ang binigyangdiin ni Bagong Henerasyon Party-list Representative Bernadette Herrera sa gitna ng usapin ng Legislated Wage Hike.
Tinukoy ng mambabatas ang Occupational Wages Survey ng Philippine Statistics Authority (PSA), sa sektor ng agrikultura, kung saan 71.6 percent ng manggagawa ang nakakatanggap ng mas mababa sa ₱13,000 na buwanang sweldo o kita. Sa manufacturing sector naman, 55.7 percent at kapwa 36.5 percent naman ng mga manggagawa sa construction at private schools ang mas mababa sa ₱13,000 ang monthly basic pay.
Ito ay kahit pa aniya batay sa 2023 data ng PSA, ang “monthly poverty income threshold sa isang pamilya na may limang miyembro ay ₱13,797.
“Kapag ang ₱13,000 dinivide by 22 work days, papatak lang sa ₱590 per day. Ganyan o mas mababa pa ang daily wage kung araw-araw ang trabaho. Malinaw na malinaw na kung bakit maraming dukha sa Pilipinas,” sabi ni Herrera.
Sa Martes, February 27, sisimulan ng Kamara ang pagtalakay sa bersyon nito ng Legislated Wage Hike. | ulat ni Kathleen Jean Forbes