Kinumpirma ni Marikina City Mayor Marcelino Marcy Teodoro na inatake ng hackers ang facebook page ng kanilang Public Information Office o PIO.
Sa inilabas na pahayag, sinabi ni Mayor Teodoro na batay sa ipinarating na ulat sa kaniya ng mga staff ng PIO, “inaccessible” o hindi na mabuksan ang naturang facebook page buhat pa kahapon, Pebrero a-22.
Matapos ang isinagawang imbestigasyon, sinabi ng Alkalde na nakumpirma nilang cyberattack nga ang nangyari.
Dahil dito, sinabi ni Teodoro na apektado ang communication channel ng LGU sa paghahatid ng impormasyon sa kanilang mga nasasakupan.
Kaya naman hinihikayat ng Alkalde ang kanilang mga kababayan na magtungo muna sa facebook page ng Marikina City Rescue 161 para sa kanilang nais isangguni ang kanilang mga concern o hinaing.
Nakikipag-ugnayan na ang Marikina City LGU sa Philippine National Police o PNP para tuntunin kung sino ang nasa likod nito at tiniyak niyang mananagot ang mga utak ng pag-atake. | ulat ni Jaymark Dagala