Pinangunahan ni Department of Transportation (DOTr) Secretary Jaime Bautista at US Ambassador to the Philippines MaryKay Carlson ang ceremonial grant signing para sa planong pagtatag ng Philippine Coast Guard (PCG) ng 10 Vessel Traffic Management System (VTMS) stations sa iba’t ibang bahagi ng bansa.
Dahil dito, ipinahayag ni PCG Commandant Admiral Ronnie Gil Gavan ang pasasalamat nito para sa oportunidad na maipagpatuloy ang feasibility study para sa installation ng 10 VTMS facilities sa bansa.
Dagdag pa ni Gavan, makatutulong ito hindi lamang sa daloy ng marine traffic bagkus pati na rin sa kinabukasan ng archipelagic sea lanes para sa kaligtasan at seguridad sa karagatan.
Ayon sa PCG, magagamit rin nito ang nasabing proyekto para mas mapalawak pa ang naaabot ng VTMS sa mga dagdag na mahahalagang pantalan at waterways sa bansa.
Taglay ng VTMS ang iba’t ibang advanced sensors tulad ng radar, very high-frequency radios, at automatic identification systems para sa komprehensibong pagmamanman sa kalagayan ng karagatan. | ulat ni EJ Lazaro