Mahigpit nang binabantayan ng Bureau of Internal Revenue ang sindikato sa loob ng ahensya na nagta-tamper ng Point of Sales-Cash Register Machines (POS-CRM).
Tiniyak ni BIR Commissioner Romeo Lumagui Jr, na sinumang empleyado na masasangkot sa iregularidad ay masasampahan ng kasong kriminal at tatanggalin sa trabaho.
Noong Mayo 2023, kinasuhan ni Lumagui ang isang BIR personnel na nakipagsabwatan sa kanyang asawa sa pag-tamper at pagbenta ng POS-CRM machines na nagmamanipula ng sales ng taxpayers.
Bukod dito, sinamahan din ito ng kasong administratibo na nangangailangan ng kumpirmasyon ng Department of Finance.
Sa ngayon, pinagtibay ng DOF ang desisyon ng BIR na pagsibak sa mga tiwaling tauhan nito.
Malugod namang tinatanggap ni Lumagui ang suporta ng DOF sa pagtataguyod ng integridad at propesyonalismo ng mga empleyado ng BIR. | ulat ni Rey Ferrer