Hindi naitago ni Speaker Martin Romualdez ang pagkamangha sa resulta ng OCTA Research survey kung saan mayorya ng mga Pilipino ang nagsabing handa silang depensahan ang Pilipinas laban sa banta ng mga dayuhan.
Batay sa Tugon ng Masa survey, na isinagawa mula Disyembre 10 hanggang 14, 2023, 77% sa 1,200 na respondent ang nagpahayag ng kahandaan na ipagtanggol ang bansa sakali mang salakayin ng mga dayuhang kaaway.
Ayon kay Romualdez, ipinapakita nito ang malalim na pagmamahal at katapatan ng mga Pilipino sa bansa at isang kahanga-hangang pagpapakita ng nasyonalismo.
“We are deeply moved and inspired by the overwhelming willingness of adult Filipinos to fight for our country. This unwavering commitment to safeguarding our sovereignty and protecting our people is a testament to the indomitable spirit that lies within every Filipino,” sabi ni Speaker Romualdez.
Ayon pa sa resulta ng survey, 84% na nagpahayag ng kahandaan sa pagtatanggol ng bansa ay mula Mindanao, kasunod ang balance Luzon (79 %), National Capital Region (76 %) at Visayas s(62 %).
Lumalabas din sa survey na 80 % ng mga Pilipinong nabibilang sa Class D ang nagpakita ng kahandaan na ipaglaban ang bansa mula sa banta ng mga dayuhan.
Sabi ng House leader pinapatunayan lamang nito na magkakaiba man ng rehiyon ay nagkakaisa ang hangarin ng mga Pilipino na pangalagaan ang integridad ng bansa.
Ang naturang survey ay kinomisyon ng Armed Forces of the Philippines (AFP), na layuning sukatin ang kagustuhan ng mga Pilipino na lumaban at ipagtanggol ang Pilipinas mula sa pananakop ng dayuhan. | ulat ni Kathleen Jean Forbes