Patuloy ang pagkakaloob ng tulong ng National Housing Authority (NHA) sa mga pamilyang biktima ng kalamidad sa bansa.
Kasama si Sen. Imee R. Marcos, pinangunahan ni NHA General Manager Joeben A. Tai ang pamamahagi ng kabuuang P9.1 milyong tulong pinansyal sa 1,837 pamilyang Cebuano na nawalan ng tirahan dahil sa Bagyong Odette sa Mandani Bay, Mandaue City, Cebu.
Ang bawat benepisyaryo ay tumanggap ng P5,000 sa ilalim ng Emergency Housing Assistance Program (EHAP) ng ahensya upang makatulong sa pagtatayo ng kanilang mga tahanan.
Sa kanya namang mensahe, nagpasalamat si NHA GM Tai sa suportang ibinibigay ng pamahalaan at ni Sen. Marcos sa ahensya upang masigurong matagumpay na maipaaabot ang tulong pabahay sa mga apektadong pamilya.
“Makaaasa po kayo na patuloy ang pagsisikap ng NHA upang magkaroon ang bawat pamilyang Pilipino ng ligtas, komportable at abot-kayang pabahay para sa isang progresibong komunidad tungo sa isang bagong Pilipinas” ani GM Tai.
Sa ilalim ng EHAP, sinisikap ng NHA na magpalawig ang mga serbisyong pabahay sa pamamagitan ng pagbibigay ayuda sa mga biktima ng kalamidad upang matulungan silang makapagpundar muli ng mga kagamitan sa bahay at maisaayos ang kanilang tahanan.
Bukod sa bagyo, handa rin ang NHA na tumulong sa iba pang naapektuhan ng sakuna tulad ng sunog, lindol at pagbaha. | ulat ni Merry Ann Bastasa