Aabot sa higit P1.8 milyong halaga ng kush o marijuana ang naharang ng mga tauhan ng Bureau of Customs at NAIA-PDEA-IADITG mula sa anim na parcel sa Central Mail Exchange Center Domestic Road sa Pasay mula California, USA.
Ang magkahiwalay na parcel na naharang ay pawang mga abandonado na idineklarang sweatshirt, graphic tee, custome puzzle set, at mga sweater na naka-consignee sa anim na indibidwal na nakatira sa Laguna, Imus, Cavite, at Pampanga.
Nadiskubre ang laman ng parcel nang idaan ang mga ito sa X-ray machine kung saan isiningit ang transparent plastic sachet na naglalaman ng kush o pinatuyong dahon ng marijuana, na may bigat na 1,307 grams at may street value na aabot sa P1,829,000 ang halaga.
Bagamat tukoy na ng mga awtoridad ang pagkakilanlan ng mga sender at consignee ng mga naturang parcel, ay patuloy pa ring nagsasagawa ng follow-up investigation kung sino-sino ang mga sangkot sa pagpupuslit ng iligal na droga papasok sa bansa. | ulat ni Lorenz Tanjoco