Inanunsyo ng National Police Commission (NAPOLCOM) na 13,420 examinee ang nakapasa sa Philippine National Police (PNP) Entrance and Promotional Examinations.
Ito ay mula sa 37,937 examinee o 30 porsyento ng mga kumuha ng pagsusulit noong Disyembre 10, 2023 sa 24 testing centers sa buong bansa at noong Pebrero 11, 2024 sa Butuan City.
Sa bilang na ito 8,399 o 28.76 porsyento ng 29,205 examinee ang nakapasa sa police entrance exam; habang 5,021 or 57.50 porsyento ng 8,732 aktibong pulis ang nakapasa sa promotional exam.
Sa mga aktibong pulis na nakapasa sa promotional exam, 39 ang nagkwalipika na ma-promote sa ranggong Police Major at Police Lt. Colonel; 234 naman sa ranggong Police Lieutenant at Police Captain; 2,897 sa ranggong Police Master Sergeant hanggang Police Executive Master Sergeant; at 1,851 sa ranggong Police Corporal at Police Staff Sergeant. | ulat ni Leo Sarne
