Sinisi ni Senador Sherwin Gatchalian sa isyu ng pagsusulong ng People’s Initiative sa naging pagtingin ng publiko sa charter change.
Ito ay kasunod ng naging resulta ng Pulse Asia survey kung saan lumalabas na mayorya sa mga Pilipino ang naniniwalang hindi pa panahon para sa charter change o amyendahan ang konstitusyon.
Para kay Gatchalian, sinira ng isyu ng People’s Initiative ang pagtingin ng taumbayan sa cha-cha, kahit pa aniya economic o political ang isinusulong na pagbabago sa Saligang Batas.
Isa pang nakita ng senador na nakaapekto kaya hindi sang-ayon ang publiko sa cha-cha ay ang nakita nilang bangayan ng mga miyembro ng Kongreso dahil sa cha-cha.
Dinagdag rin ng mambabatas ang isyu tungkol sa korapsyon gaya ng pagbili ng mga pirma para sa People’s Initiative.
Aminado si Gatchalian na dahil sa resulta ng survey na ito ay mas magiging hamon na maipasa ang panukalang economic cha-cha.
Ito rin aniya ang dapat magtutulak sa mga mambabatas na ipaliwanag pang maigi sa taumbayan ang mga isinusulong na amyenda sa economic provision ng Saligang Batas. | ulat ni Nimfa Asuncion