Simula ngayong araw, Abril 8, ipapatupad ng Manila Water ang Looping and Interconnection Project sa kahabaan ng Ortigas Avenue Extension sa Cainta, Rizal.
Sa abiso ng water concessionaire, maglalatag ng 2200 mm (millimeter) x 300 mm line sa bahagi ng Ortigas Extension.
Gagawin ang aktibidad tuwing alas-10 ng gabi hanggang alas-4 ng madaling araw at tatagal hanggang Hulyo 7 o kabuuang tatlong buwan.
Dahil dito, inaasahan nang makaapekto sa daloy ng trapiko ang gagawing proyekto.
Gayunman, mananatiling bukas sa mga motorista ang lahat ng lanes hanggang matapos ang proyekto.
Ngayon pa lang humihingi na ng pang-unawa sa publiko ang pamunuan ng Manila Water sa abalang idudulot nito. | ulat ni Rey Ferrer