Nakabantay ngayon ang Kamara sa sitwasyon ng mga magsasaka ng sibuyas sa bansa kasunod ng napaulat na pananamantala muli ng mga trader.
Ayon kay House Deputy Majority Leader Erwin Tulfo, nakikipagtulungan sila ngayon sa House Committee on Agriculture at iba pang ahensya ng pamahalaan para bantayan ang kalagayan ng onion farmers.
Nakatanggap kasi aniya sila ng mga ulat na hinahakot ng mga trader ang kanilang mga pananim sa hindi makatarungang halaga.
Kailangan aniya na palagiang bantayan ang mga trader na ito na sinasamantala ang mga magsasaka sa pagbili ng kanilang mga ani ng palugi na kalaunan ay makakaapekto naman sa bentahan ng sibuyas sa merkado.
Sabi pa ni Tulfo na hindi lang ang mga magsasaka ang kawawa sa ganitong modus kundi pati ang mga mamimili oras na tumaas ang presyo ng bentahan.
Matatandaan aniya na nag-ikot na sila noon nina Speaker Martin Romualdez at nag-inspeksyon sa mga bodega ng traders.
“Mukhang kailangan araw-arawin namin itong mga ito dahil pawang pinapahupa lang nila ang isyu at kapag tahimik na ay muli silang namamakyaw ng mga sibuyas na bagsak presyo, maaaring hino-hoard o tinatago at binebenta naman sa ‘di hamak na mataas na halaga sa merkado,”sabi ni Tulfo.
Patuloy naman aniyang isusulong ng Kamara ang kapakanan at interes ng mga Pilipino lalo na ng mga lokal na magsasaka. | ulat ni Kathleen Jean Forbes
